A hipertensión pulmonar tromboembólica crónica é unha complicación pouco frecuente do embolismo pulmonar, potencialmente curable mediante tromboendarterectomía pulmonar, aínda que ata un 45 % dos e das pacientes son inoperables debido ao alto risco cirúrxico ou trombos non accesibles. Nestes casos, a anxioplastia pulmonar con balón (ABAP) e o tratamento farmacolóxico con vasodilatadores son as alternativas dispoñibles. A evidencia indica que a ABAP mellora a capacidade de esforzo, alivia os síntomas e incrementa a calidade de vida fronte ao tratamento exclusivamente farmacolóxico. Por tratarse dun procedemento complexo, require varias sesións e debe realizarse en centros de referencia con equipos multidisciplinares e pacientes adecuadamente seleccionados/as.