Neste documento especifícase paso a paso o proceso que debe seguir o diagnóstico, tratamento e seguimento de todos os doentes con sospeita de Insuficiencia Cardíaca (IC) na Área Sanitaria de Santiago de Compostela e Barbanza. Froito do consenso entre profesionais de diferentes especialidades: Cardioloxía, Medicina Interna, Farmacia, Urxencias e Medicina de Familia, o obxectivo é introducir vías, con circuítos e actividades definidos polos que o proceso discorra de xeito fluído. As enfermidades cardiovasculares representan a principal causa de morte en España. No ano 2020, foron responsables do 23 % dos falecementos. Dentro deste grupo de enfermidades, a insuficiencia cardíaca ocupa o sétimo posto en mortalidade. Ademais, a IC é a causa máis frecuente de ingreso hospitalario en maiores de 65 anos en series nacionais, e tamén en Galicia.