Resolución
do 25 de xuño de 2009, da Xerencia do Servizo Galego de Saúde, pola que se
modifican as resolucións da Secretaría Xeral do Servizo Galego de Saúde do 11
de decembro de 2008 polas que se convoca concurso-oposición
para o ingreso nas categorías de persoal licenciado sanitario do organismo.
Por varias resolucións da Secretaría Xeral do Servizo
Galego de Saúde do 11 de decembro de 2008 (DOG Nº 247, do 22 de decembro),
convocouse concurso-oposición para as categorías de facultativo
especialista de área de diversas especialidades, médico de urxencias
hospitalarias, médico de familia de atención primaria, pediatra de atención
primaria, farmacéutico de atención primaria, odontólogo de atención primaria e
médico coordinador do 061.
Entre os exercicios da fase de oposición que se
establecen no anexo III das devanditas resolucións, figura un exercicio sobre o
contido da parte común do programa (temas 1 ao 8, inclusive), que de
conformidade co establecido no artigo 35 do Decreto lexislativo 1/2008, do 13
de marzo, polo que se aproba o texto refundido da Lei da función pública de
Galicia, se realizará exclusivamente en lingua galega.
Por outra banda, e respecto ao exercicio de
coñecemento da lingua galega, non se recolle a exención da súa realización para
os aspirantes que estean en posesión do Celga 4, ou
equivalente debidamente homologado, prevíndose tan só a exención deste
exercicio para os aspirantes da quenda de promoción interna.
A Lei 2/2009, do 23 de xuño, de modificación do
Decreto lexislativo 1/2008, do 13 de marzo, polo que se aproba o texto
refundido da Lei da función pública de Galicia, modifica a redacción do
devandito artigo 35 e na disposición transitoria única establece a aplicación
da liberdade de elección da lingua galega e castelán nos procesos selectivos en
curso respecto dos exercicios que aínda non estean realizados.
De conformidade co anterior, e tendo en conta que a
realización dos exercicios da fase de oposición para o ingreso nas citadas
categorías está previsto para o vindeiro 27 de xuño de 2009, procede adaptar o
anexo III das devanditas resolucións á nova redacción do artigo 35 do Decreto
lexislativo 1/2008, do 13 de marzo.
Este centro directivo, en uso das competencias
atribuídas polo Decreto 311/2009, do 28 de maio, polo que establecese a
estrutura orgánica dos servizos centrais do Servizo Galego de Saúde,
RESOLVE:
Primeiro.-Modificar o parágrafo 1 da
base sétima das resolucións da Secretaría Xeral do Servizo Galego de Saúde do
11 de decembro de 2008 (DOG nº 247, do 22 de decembro), polas que se convoca concurso-oposición para o ingreso nas categorías de
facultativo especialista de área de diversas especialidades, médico de
urxencias hospitalarias, médico de familia de atención primaria, pediatra de
atención primaria e odontólogo de atención primaria, que terá a seguinte
redacción:
1. Para o acceso á categoría convocada, os/as
aspirantes da quenda de promoción interna estarán exentos de realizar o
exercicio sobre o contido da parte común do programa (temas 1 ao 8, ambos
inclusive).
Segundo.-Modificar o anexo III das
resolucións da Secretaría Xeral do Servizo Galego de Saúde do 11 de decembro de
2008 (DOG nº 247, do 22 de decembro), polas que se convoca concurso-oposición
para o ingreso nas categorías de facultativo especialista de área de diversas
especialidades, médico de urxencias hospitalarias, médico de familia de
atención primaria, pediatra de atención primaria, farmacéutico de atención
primaria, odontólogo de atención primaria e médico coordinador do 061, que terá
a seguinte redacción:
ANEXO III
1º Exercicio (eliminatorio):
Consistirá na contestación por escrito dun
cuestionario de 100 preguntas tipo test con catro respostas alternativas, máis
10 preguntas de reserva, de supostos prácticos sobre o contido da parte
específica do programa do anexo V, e directamente relacionados coa actividade
específica dos centros, nun prazo máximo de 180 minutos.
Este exercicio será valorado de
As respostas correctas puntuarán positivamente, as non
contestadas non terán valoración ningunha e as contestadas erroneamente serán
penalizadas co cuarto do valor asignado á contestación correcta.
Para superar este exercicio deberá alcanzarse unha
puntuación do 50% do seu valor.
2º Exercicio (obrigatorio non eliminatorio):
Consistirá na contestación por escrito dun
cuestionario de 10 preguntas tipo test con catro respostas alternativas, máis 2
preguntas de reserva, sobre o contido da parte común do programa do anexo V
(temas 1 ao 8, inclusive), nun prazo máximo de 15 minutos.
Este exercicio será valorado de
As respostas correctas puntuarán positivamente, as non
contestadas non terán valoración ningunha e as contestadas erroneamente serán
penalizadas co cuarto do valor asignado á contestación correcta.
3º Exercicio (obrigatorio non eliminatorio):
Consistirá na contestación por escrito dun
cuestionario de 10 preguntas tipo test con catro respostas alternativas, máis 2
preguntas de reserva, mediante o cal se evidencie o coñecemento por parte dos
aspirantes da lingua galega, nun prazo máximo de 15 minutos.
Este exercicio será valorado de
As respostas correctas puntuarán positivamente, as non
contestadas non terán valoración ningunha e as contestadas erroneamente serán
penalizadas co cuarto do valor asignado á contestación correcta.
Estarán exentos da realización deste exercicio os
aspirantes que acrediten posuír o Celga 4, ou
equivalente debidamente homologado polo órgano competente en materia de
política lingüística da Xunta de Galicia (curso de perfeccionamento de galego,
de conformidade co establecido na disposición adicional segunda da Orde do 16
de xullo de 2007, pola que se regulan os certificados oficiais acreditativos dos
niveis de coñecemento da lingua galega), aos que se lles asignarán 5 puntos.
Santiago de Compostela, 25 de xuño de 2009.
Rocío Mosquera
Álvarez
Xerenta do Servizo Galego de Saúde